நம்மையெல்லாம் சிரிக்க வைத்த ஒருவன் (அன்பு கூடும்பொழுது மரியாதை குறைகிறது) இன்று இறைவனடி சேர்ந்துவிட்டான். ஏனோ நம்மை வெறுத்துவிட்டான். ஆம், வெறுத்துவிட்டான் என்பதே சரி. அவன் அப்படிச் செய்ததற்கும் ஒரு நல்ல காரணம் இருக்கிறதே. நேற்று பெய்த மழையில் முளைத்த காளான்களுக்கு எல்லாம் பெரிய அங்கீகாரம் கிடைத்திருக்கிற வேளையில், இந்த நான்முகனுக்கு என்ன செய்தோம். இது தமிழ்த்திரையுலகம் கூனிக்குறுக வேண்டிய தருணம். நான் விருதும் புனைப்பெயர்களும் வாங்கியவர்களை குறை கூறவில்லை. ஆனால் நாகேஷுக்கு என்ன செய்தார்கள் என்றுதான் கேட்கிறேன்.

இன்று அவரின் பூத உடல் முன்பு இல்லாத சோகத்தை காட்டிக் கொண்டிருக்கும் பல புண்ணியவான்கள், அவருக்கு கிடைக்க வேண்டிய அங்கீகாரத்துக்காக ஏன் குரல் எழுப்பவில்லை. கமல் ஒருவரைத் தவிர யாரும் அதற்காக கவலைப்பட்டதாகக் கூட தெரியவில்லை. ஒருவேளை அது நடிப்பு சமாசாரம் நமக்கெதற்கு என்று விட்டுவிட்டார்களோ?

இனி அவருக்கு தேசிய அளவில் எல்லாம் அங்கீகாரமும் கிடைக்கும். பாவம் அவர்தான் இருக்க மாட்டார் அதை ஏற்றுக்கொள்ள இனி அவர் பெயரில் பல விருதுகள் வழங்கப்படும். தற்போதிருக்கும் அனைத்து நகைச்சுவை நடிகர்களும் அந்த விருதுகளை வாங்கிச் செல்வார்கள். பாவம் நாகேஷ் தான் இருந்து பெருமைப்பட்டுக் கொள்ள முடியாது. தமிழக அரசு அவரது குடும்பத்திற்கு பண உதவி வழங்கும்.

நகைச்சுவை நடிகன், கதாநாயகன், நடனக் கலைஞர் மற்றும் நல்ல மனிதன் என்ற நான்கு முகங்களை தன்னுள் கொண்டவர் நாகேஷ். எல்லோரும் அவரின் திருவிளையாடல் மற்றும் எங்க வீட்டுப் பிள்ளை போன்ற MGR, சிவாஜியின் படங்களில் அவரின் நடிப்பாற்றலை குறிப்பிடுகிறார்கள். என்னைப் பொறுத்தவரை, அவரின் சிறந்த படைப்பு அவர் கதாநாயகனாக நடித்த படங்களில் இன்னும் சிறப்பாக வெளிப்பட்டது. நாகேஷ் சரியான வாய்ப்புக் கிடைக்காத ஒரு சிவாஜியென்றால் அது மிகையல்ல.

அவரது நகைச்சுவையின் வீச்சை, நீர்க்குமிழி, எதிர்நீச்சல், யாருக்காக அழுதான் படங்களில் அவர் வெளிப்படுத்திய குணச்சித்திர நடிப்பே அவரது நடிப்புத் திறமைக்குச் சான்று.

ஒரே சமயத்தில் இரு பெரும் கதாநாயகர்களின் படங்களில் நடித்து இருவரிடமும் நற்பெயர் பெற்றவர். கீழ்வரும் அவரது ரத்தினங்களில் ஒரு சில படங்கள் அந்தந்த காலக்கட்டத்தில் பெரிய கதாநாயகர்களுடன் நடித்து பெரும் வெற்றி பெற்றவை.

எம்.ஜி.ஆர் – உலகம் சுற்றும் வாலிபன், எங்க வீட்டுப் பிள்ளை
சிவாஜி – திருவிளையாடல், கலாட்டா கல்யாணம்
கமல்ஹாசன் – அபூர்வ சகோதரர்கள், மகளீர் மட்டும், பஞ்ச தந்திரம்
ரஜினிகாந்த் – தில்லுமுல்லு, படிக்காதவன்

அவர் நம்மைப் பிரிந்தது தடுக்க முடியாதென்றாலும், அவருக்கு நாம் செலுத்தும் முழுமன அஞ்சலி அவரது ஆன்மாவை குளிரவைக்கும்.

ரஜினி கூறியது போல் நாகேஷ் ஒரு மேதை. எப்படி சார்லி சாப்ளின் வாழ்வில் ஒரு சோகம் இருந்ததோ, நாகேஷ் வாழ்விலும் இருந்தது குறிப்பிடத்தக்கது. நாகேஷ் தன் திரையரங்கை பணக் கஷ்டத்தினால் விற்ற போது எங்கே போனார்கள் இன்று செயற்கையாக கண்ணீர் விடுவோர்?

யார் என்ன சொன்னாலும், எப்படி நடத்தியிருந்தாலும், இன்றில்லை, என்றுமே எங்கள் மனதில் நீங்கா இடம் பிடித்து சிம்மாசனம் போட்டு உட்கார்ந்து கொண்டிருக்கிறாய். உன் அனைத்து படைப்புகளும் எங்களுக்கு நினைவலைகள். இனி உன்னை எப்பொழுது திரையில் பார்த்தாலும் எங்கள் கண்களில் நீர்த்திவலைகள்.

“Death comes to all but great achievements build a monument which shall endure until the sun grows cold.”

நான் வெளியூர்களுக்கு வேலை நிமித்தமாக (கெக்றான் மெக்றான்) சென்றிருக்கிறேன் (துபாய், சார்ஜா, அபி தாபி, பக்ரீன் போன்ற). அங்கு இருக்கையில் இதே போல் மாத மளிகை தேவையை பூர்த்தி செய்ய காரிஃபோர், லூலூ (தமிழ்ல எழுதும்போது பெயர் காமெடியாத்தான் இருக்கு) நண்பர்களுடன் செல்வது வழக்கம் (”வழக்கம்” நிர்மலா பெரியசாமி தோணியில்). ஏனென்றால் ”அடிக்கடி” போவோம். சும்மா இருந்து ”கடி”த்தாலும் போவோம்.அங்கே ”அடிக்கு அடி” தான் போவோம். அப்பொழுதுதானே நேரத்தை வீணாக்க முடியும்.

அங்கெல்லாம் ஷாப்பிங் ஒரு பொழுது போக்காகவே இருக்கிறது என்பது என் கருத்து. குடும்பத்துடன் வெளியே போக ஒரு சந்தர்ப்பமாகவே இருந்திருக்கிறது. கிடைக்கும் இரண்டு நாள் லீவை ஒரு நாள் அதிலேயே கழித்துவிடுவோம். ஆம் சிலர் கழிப்பது கூட அங்கேதான் என்றால் பார்த்துக் கொள்ளுங்களேன்.

மத்தியானமாக கிளம்பி வெளியில் ஒரு உடுப்பியிலோ அல்லது சரவணபவனிலோ சாப்பாட்டுக் கதையை முடித்துக் கொண்டு, அப்படியே லூ லூ போய்விட்டு நைட் டாக்ஸியில் வரும்போதே இரவு சாப்பாட்டுக்கு மீண்டும் உ அல்லது ச யிலோ ஹோம் டெலிவெரிக்கு சொல்லிவிட்டு அந்த நாளை இனிதே முடித்துக் கொண்டுவிடுவோம்.

தள்ளுபடி….

சும்மா சொல்லக்கூடாது, அங்கே தள்ளுபடியோ தள்ளுபடிதான் போங்க. 5 திர்ஹாமுக்கு (துபாய் ரூபாய்) 10 குளியல் சோப், 25 திர்ஹாமுக்கு ஃபாமிலி பாக் மேகி பாக்கெட் நாலு கிடைக்கும். உண்மையிலேயே அங்கு கிடைக்கும் தள்ளுபடி நம்மை செலவு செய்யும்படி செய்யும் கூடவே உபயோகமானதாகவும் இருக்கும். இதை ஒரு வியாபார யுக்தியாகக் கருதி என்னற்ற பொருட்களின் மேல் தள்ளுபடி கொடுத்தாலும் அநேகமான பொருட்கள் நமக்கு தேவையானதாக இருப்பதே இதன் சிறப்பம்சமாக கருதுகிறேன். நானே நேரடியாக அனுபவித்தும் இருக்கிறேன்.

இடம்…

இன்னொரு நல்ல விஷயம் என்னவென்றால் அங்கு நம் வாகனங்களை நிறுத்துமிடம் மிக பெரியது. வாகனத்தை நிறுத்துவதற்கும் சரி அதை திரும்ப எடுக்கும் போதும் சரி மற்ற வாகனங்களை பற்றிய கவலை வேண்டாம். நம்மூரில் நம்ம கார் முன்னேதான் ஒரு ஸ்கூட்டர் நிற்கும், நம் ஸ்கூட்டருக்கு பின் கண்டிப்பாக இன்னொரு ஸ்கூட்டரோ அல்லது ஒரு சைக்கிளோ நிற்பது உறுதி. அது நாம் அங்கு போவதற்கு முன்னமே தெரிந்துவிடும். இது நிச்சயமாக இடப்பற்றாக்குறை என்று காரணம் காட்டி விடமுடியாது..விடவும் கூடாது.

உற்றார் உறவினர்….

நாம் ஊரிலிருந்து வருகிறோம் என்ற செய்தி குடும்பத்தாருக்கு எட்டிய உடனே லிஸ்ட் ரெடியாகிவிடும். அந்த சோப் போன தடவை வாங்கிவந்தியே…அது பக்கத்து வீட்டு பங்கஜத்துக்கு வேணுமாம் என்று தாயார் முதல் சாமானை லிஸ்டில் சேர்த்துவிடுவார் (அது சரி, அது என்னங்க ’பக்கத்து வீட்டு’ அப்படின்னாலே பங்கஜம் தானா? பாவம் அந்த பங்கஜம்)

நாமும் அங்கு வித்து போகாத வாசானாதிரவியங்களை (தள்ளுபடியில் போட்டால் மட்டுமே. இல்லையென்றால் என்ன த.படில போட்டிருக்கோ அதுதான்) எக்கசக்கமாக வாங்கிவந்து ரோட்டுல தெய்வமேன்னு போகிறவனையெல்லாம் கூப்பிட்டு கொடுப்போம். செம கப்பாக இருந்தாலும், ஃபாரின் செண்ட்டென்று பெருமைப்பட்டுக் கொள்வார்கள். இந்த வரிசையில் நெடுங்காலமாக இடம்பெற்று வரும் சில பொருட்கள் பெளடர், செண்ட், சோப், சவர ப்ளேடு,, பென், குழந்தைகள் ஸ்கூல் பாக்ஸ் செட், ட்ரை ஃப்ரூட்ஸ். சிலர் தலையனை, பெட்ஷீட்டு, பெட்டிகள்ன்னு கொஞ்சம் பெரிய லிஸ்டோடு வருவார்கள். இன்னும் சிலர் ரமலான் காலத்தில் டிவி, மைக்ரோ வேவ், எமெர்ஜென்சி விளக்கு என்று மெகா பட்ஜெட்டோடு வருவார்கள்.

நானும் எனது அண்ணணும் இது போன்று ஷாப்பிங் போனால், அங்கு முக்கியமாக முதலில் வாசனை திரவியங்கள் விற்கும் கடைக்கு சென்று கடைக்காரருக்கு வாங்குவதாய் ஒரு மனப் பிராந்தியை உண்டு பண்ணி காசு கொடுக்காமலேயே இரண்டு நாட்களுக்கு போதுமான செண்ட் ஆடைகளில் அடித்து கொண்டு வந்து விடுவோம் (கர்சீப் உள்பட).

சாக்லெட், திராட்சை, முந்திரி போன்ற பொருட்கள் அங்கு கொட்டிக் கிடக்கும். நான் வலது பக்கத்தை பார்த்துக்கொண்டே இடது கையை விட்டு இரண்டு (இரண்டுன்னா இரண்டா….ஒரு கைங்க) அள்ளி போட்டுக் கொள்வேன் (வாயிலதான்). நாங்க டேஸ்ட் பார்க்கிறோம்…ஏன் இப்படி எத எடுத்தாலும் தப்பாவே நினைக்கிறீங்க எங்களை.. L

இங்க நம்ம நாட்டுல பின்பற்றாத பல விஷயங்கள் அங்கே பின்பற்றுவோம். உதாரணத்திற்கு சில:

1.   அங்க ட்ராலி நகர்த்தும் போது அடுத்தவ்ர் மீது பட்டுவிட்டால் 256 சாரி/எக்ஸ்யூஸ் மீன்னு அடிச்சிவிடுவோம். நம்ம ஊர்ல இடித்து விட்டு எதுவுமே நடக்காதது போல் போயிகிட்டே இருப்போம்.

2.   மத்தவங்களுக்கு சாமான் எடுத்துக் கொடுத்து உதவுவோம். இங்க முதல்ல நம்ம கதை அப்புறம்தான் மத்ததெல்லாம்

3.   கார் பார்க் செய்யும் போது மத்தவங்க கார் மேலே ரொம்ப அக்கறை எடுத்து பார்த்து பார்த்து நிறுத்துவோம். இங்க போறபோக்கில ஒரு கோடு போட்டு போயிகிட்டே இருபோம். நம் கார்ல ரெண்டு கோடு விழுந்தத வீட்டுக்கு போய்தான் கவனிப்போம் அது வேறே விஷயம். என்ன கொடுமைன்னா..அவன சகட்டுமேனிக்கு திட்டித்தீர்ப்போம்.

4.   அடுத்தவங்க குழந்தைகள நேருவோடா ஜோரா கொஞ்சுவோம். இங்க “வளர்த்து இருக்காங்க பாரு புள்ளைய..புள்ளையா அது” டயலாக் தான்.

5.   மத்தவங்க இடிச்சிட்டா..”இட்ஸ் ஓகே”ன்னு சொல்லி முடிக்கிறது அங்க. ஏன் சார், என்ன அவசரம், போங்க(வெறுப்பாய்)ன்னு நம்ம 185க்கு வந்த ரத்தக்கொதிப்பை வெளிப்படுத்துவோம்.

இவ்வளவு தாங்க என் சொந்த அனுபவத்தில தெரிஞ்சது…இதுக்கு மேலே உங்க அனுபவத்தை எழுதுங்க…

இப்படி என்னதான் ஜாலியா(?) ஊர்சுற்றினாலும், நாள் முழுவதும் நம்ம மனசுல நம்ம பொண்டாட்டி, பிள்ளைங்க, வயதான பெற்றோர்கள் நினைவுதான் ஓடிகிட்டு இருக்கும். அதுவும் ஒரு வகையான வருத்தம் கலந்த துக்கம். அதப்பத்தி ஒரு இடுக்கை போடலாம் என்றிருக்கிறேன்.

எனக்கு தெரிந்தவரை பஜாஜ் சப்தஸ்வரங்கள் தவிர்த்து மற்ற எந்த ஒரு இசை நிகழ்ச்சியும் இந்த தாக்கத்தை ஏற்படுத்தியதாக தெரியவில்லை. நிகழ்ச்சியை தொகுத்து வழங்குவதும் ஒரு கலை. இதில் என்ன ஒரு விசேஷம் என்றால், இந்த நிகழ்ச்சி ஒளிபரப்பாவது ஸ்டார் விஜய் டிவியில். இது வடநாட்டு ஸ்டார் டிவியின் ஒரு அங்கம் என்பது எல்லோருக்கும் தெரிந்ததே.

தமிழ், தமிழ் எங்கள் மூச்சு, அதுவே எங்கள் பேச்சு என்று பறைசாற்றிக் கொள்ளும் பல தொலைக்காட்சிகள் நல்ல தமிழ் உச்சரிக்கும் தொகுப்பாளர்கள் தேர்ந்தெடுக்கும் விஷயத்தில் தவறியது / தவறுவது சாதரணமாக விட்டுவிடமுடியவில்லை.

ஸ்டார் விஜய்யின் ஏர்டெல் சூப்பர் சிங்கர் தொகுப்பாளினி சின்மயி ஒரு எடுத்துக் காட்டு. அவர் அந்த நிகழ்ச்சியை தொகுத்து வழங்கும் விதத்திற்கே பல ரசிகர்கள். நானும் ஒருவன் என்பதில் இரட்டிப்பு (1. நன்றாக தொகுத்து வழங்குவது. 2. திருவல்லிக்கேணியை சேர்ந்தவர்) மகிழ்ச்சி. அவர் குரலும் அதில் விளையாடும் தமிழும் கேட்பதற்கு இனிமை. ஒரு பெண் அதுவும் இந்தக் காலத்துப் பெண் அதுவும் சினிமா இசையை மைய்யமாக கொண்ட ஒரு நிகழ்ச்சியில், இப்படி தமிழ் பேசி தொகுத்து வழங்குவதென்பது அரிய ஒன்றாகக் கருதுகிறேன். சந்தேகமிருந்தால் மற்ற தொலைக்காட்சியில் வரும் இசை நிகழ்ச்சிகளை பாருங்கள்.

அவர் பதிவுகளை படித்ததில், அவரை பற்றியும் கொஞ்சம் தெரிகிறது. அவருடைய எழுத்தார்வம், ஆங்கிலத்திலும் புலமை, உரியவர்களுக்கான அவருடைய மனது, தேசப்பற்று, பெரியவர்கள் மீது அவர் வைத்திருக்கும் மரியாதை, இசை மீது அவர் கொண்டுள்ள அபிரிமிதமான காதல் இப்படி நீங்கள் படிக்க படிக்க தித்திப்பாகவே தெரிகிறார்.

நம்மில் எத்தனை பேருக்கு அவர் சில காலமாகவே “டப்பிங்” பேசுவது தெரியும். உன்னாலே உன்னாலே, தாம்தூம் போன்ற அண்மையில் வந்த படங்களில் கூட பேசியிருக்கிறார். அவர் கர்நாடக சங்கீதத்தில் தேர்ச்சிப் பெற்றவரும் கூட. சின்மயி சினிமாவில் பாடியும் இருக்கிறார். கோல்டன் க்ளோப் பெற்ற ரஹ்மான் சினிமா இசைக்கு கொடுத்த பல தங்கத்தில் இவரும் ஒருவர்.

போட்டியாளர்களில் மூவர் எனக்கு நேரடியாகவோ மறைமுகமாகவோ தெரிந்தவர்கள் தான். அவர்களிடம் பேசும்போது சின்மயி உற்சாகபடுத்தும் விதத்தை குறிப்பிட்டுச் சொல்வார்கள்.

தொகுத்து வழங்க இனி அவர் இல்லை இந்த நிகழ்ச்சியில் என்ற செய்தியை அவருடை பதிவிலிருந்து தெரிந்து கொண்டேன். ஒருவேளை அதை நான் பார்திராமல் இருந்திருந்தால், அடுத்த வாரம் வருவார் என்று வாராவாரம் என்னை நானும் அவரது ரசிகர்களும் தேற்றிக்கொண்டிருப்போமோ?

எது எப்படி இருந்தாலும், இந்த சிறிய வட்டத்துக்குள்ளிருந்து வெளிப்பட்டு இன்னும் நிறைய சாதிக்க எல்லாம் வல்ல அந்த நாரயணனை ப்ராத்திக்கிறேன்.

சின்மயி, உன் இடத்தை இன்னொருவர் வந்து நிரப்புவார் ஆனால் உன் போல் அவரும் இந்த நிகழ்ச்சியை நடத்துவாரா?

பன்பலைவரிசையில் ஆஹா! என்ன காபியில் சின்மயி பிய்த்து உதறுவதை கேளுங்கள்.

கூட்டம் அலைமோதுகிறது. வாங்குபவர்கள், நோட்டம் பார்க்க வந்தவர்கள் என ஒரு மினி சென்னையே உள்ளுக்குள் உலவுகிறது. “இந்த மாதம் உங்கள் சேமிப்பு என்ன?” என்பது போன்ற விளம்பரங்களின் விளைவே இந்த கூட்டம் என கருதுகிறேன்.

என்னுடைய நேற்றய அனுபவம் இங்கே:-

1.   அநேகமான பொருள்களின் விலைக்குறைப்பு என்பது முக்கால்வாசி உங்கள் வீட்டின் அருகில் உள்ள மளிகை கடையிலேயே கிடைக்கிறது.

2.   நாம் நினைப்பது போல அப்படியொன்றும் பெரிதாக சேமிப்பதாக எனக்கு தெரியவில்லை. ரூ.3000க்கு சாமான் வாங்கினால், ரூ.300 சேமிப்போம். இதில் ஆட்டோவுக்கான ரூ.100 போய்விடும். அலைஞ்சு திரிஞ்சு நாம் தேடி எடுத்ததற்கான சன்மானமே அந்த ரூ.200 என்று கருதுகிறேன். நான் வழக்கமாக வாங்கும் மளிகைக் கடையில் தொலைப்பேசியில் சொன்னால் வீட்டிற்கே சாமான் வந்துவிடும்.

3.   சேமிக்கிறோம் என்றெண்ணி இரண்டு மாதத்திற்கான சாமான் வாங்கிவிடுவோம். நம் மளிகைக் கடையில் ஒரு மாத கணக்கே வரும். க்ரெடிட் கார்டில் வாங்குபவர்கள் தேவையில்லாமல் 2 மாதத்திற்கு வாங்குவதினால், வட்டி கட்ட வேண்டி வரும். இவர்களுக்கு அந்த ரூ.200 சேமிப்பும் கிடையாது.

4.   நமக்கு தேவையான அன்றாட பொருட்களின் மேல் தள்ளுபடி கிடைப்பது அரிது.

5.   இடப் பற்றாக்குறையை தீர்க்க உடனடியாக ஏதாவது செய்தால் நன்றாக இருக்கும்,

6.   பார்க்கிங் மற்றொரு தொல்லை. இது பிக் பஜாரின் குறையல்ல. ஆனாலும் கொஞ்சம் சிரமமாகவே இருக்கிறது.

7.   நமக்கு தேவையான பொருள்கள் பல கம்பெனிகளின் தயாரிப்புகளில் கிடைப்பது மிக நல்ல விஷயமாகப்படுகிறது. எந்தத் தயாரிப்புகளை வாங்கலாம் என்ற முடிவெடுக்க நல்லதொரு வாய்ப்பினை அளிக்கிறது. அதுவே நம் உள்ளூர் கடைகளில் வாங்கினால் கிடைப்பது கடைக்காரன் கொடுப்பதுதான்.

8.   ஒரே இடத்தில் எல்லா பொருட்களும் கிடைப்பது நம் அலைச்சலை தவிர்க்கிறது அத்தோடே நம் நேரத்தையும் சேமிக்கிறது.

9.   தள்ளுபடி இருந்தால் மட்டுமே முக்கால்வாசி மக்கள் பொருட்களை பார்க்கிறார்கள். மற்றவைகளை (நல்ல பொருளாய் இருந்தாலும்) சீண்டிப்பார்த்து சிரமம் எடுத்துக் கொள்வதில்லை.

10.  என்னதான் வீட்டிலிருந்து கிளம்பும் முன் வாங்கவேண்டிய சாமான்களின் லிஸ்ட் எடுத்துக் கொண்டு போனாலும், அங்கு தேவையற்ற பல சாமான்களை வாங்கிவிடுவோம். உபரியாக வாங்க வேண்டியதை முக்கியமாக வாங்கி, முக்கியமானதை விட்டுவிட்டு வருவோம். இதனால் அதிகமான செலவு மற்றும் முக்கியத் தேவைகளை வாங்காதது போன்ற மைனஸ் பாயிண்டுகள் உண்டு.

இதே சுப்பர் மார்க்கெட் வெளிநாடுகளில் எப்படி என்பதை இந்தப் பதிவின் தொடர்ச்சியாக அடுத்த பதிவில் பதிக்கிறேன் (பெரிய சிற்பி..பதிச்சிட்டாலும் அப்படின்னு நீங்க சொல்றது என் காதுல விழவே இல்லைங்க).

நம் அன்றாட வாழ்க்கையில் வியப்புகளிலேயே மிக பெரியது ஒரு கவிஞனின் கற்பனை சக்தியாகத்தான் இருக்கும்.

பல விஞ்ஞானிகள் சேர்ந்து என்னென்னவோ யோசித்து புரிவதற்க்கே மிக கடினமான பல கணிப்புகளை வைத்து கிட்டதட்ட ஒரு தவம் போல ஒரு வாழ்கை வாழ்ந்து 2 அல்லது 3 ஆண்டுகளுக்கு ஒரு விண்கலத்தை (அஃறினை) நிலவுக்கு செலுத்துகிறார்கள்.

ஆனால் நம் கவிஞர்கள் இந்த கஷ்டம் எதுவும் இல்லாமல் மிக சுலபமாக நிலவுக்கு போய்விட்டு வந்துவிடுவார்கள். உதரணத்திற்கு பல பாடல்களை சொல்லலாம். முக்கியமாக வைரமுத்து அவர்களின் அநேக பாடல்களை கேட்டுப் பார்த்தால் புரியும்.

என்னை பொறுத்தவரை இதுவும் கிட்டதட்ட ஒரு தவ வாழ்க்கை போலத்தான். எல்லோருக்கும் வந்துவிடுவதில்லை கவிதை.

கவிஞர்களின் மூளை வேகமும் அவர்களின் யோசிக்கும் திறனும் இன்னும் வியப்பு. உதரணமாக கவி. வாலியிடம் அவரது ஆசிரியர் கேட்டாராம் எங்கே வாலை காணோம் என்று. அதற்கு வாலியின் பதில் ஒரு கவிதை:

’வாலில்லை என்பதால்
வாலியாகக் கூடாதா?
காலில்லை என்பதனால்
கடிகாரம் ஓடாதா?’

அவருடைய பொய்க்கால் குதிரைகள் என்ற புத்தகத்தின் முதல் கவிதை. இதோ உங்களுக்காக இங்கே:-

நான் வாசிப்பதும் – சு
வாசிப்பதும் – விசு
வாசிப்பதும்
உனையே – தமிழ்
அனையே – தீன்
சுனையே – கா
எனையே

இதுபோல பல சொல்லலாம்…..சொல்லிக்கொண்டே போகலாம்.

வைரமுத்து ஒரு பாடலில்:

கண்ணில் மிதக்கும் கனவா நீ
கை கால் முளைத்த காற்றா நீ……
கைய்யில் ஏந்தியும் கனக்கவில்லையே
நுரையால்..செய்த சிலையா….

இது கற்பனையென்றால்…இதோ அறிவியல் கலந்த கற்பனை..

நிலவில் பொருள்கள் எடை இழக்கும்…
நீரிலும் பொருள் எடை இழக்கும்
காதலில் கூட எடை இழக்கும்…
கண்டு கொண்டேன் அடி…

வாலியின் மொத்த அவதார புருஷனும் கவிஞர்களின் கற்பனைத் திறனுக்கு ஒரு எடுத்துக் காட்டு. இதுவரை ஆயிரத்துக்கும் மேற்பபட்டோர் இராமனை வர்ணித்து இருப்பார்கள். ஏன் வாலியே பல பாடல்களில் கதாநாயகனை உவமைக் கொண்டு வர்ணித்து இருப்பார். இருந்தாலும் அவரது அவதார புருஷனில்:

இவன் –
வான சூரியன் வம்சத்தில் வந்த
ஞான சூரியன்
மனிதச் சட்டையை
மாட்டிக்கொண்டு-
மண்ணில் இறங்கிய இறை

இதைவிட எளிமையாக ராமனை என்போல ஒரு பாமரனுக்கு அறிமுகப்படுத்திவிட முடியாது. மேலும்….

தேயும் நிலாவைக்
தாயும் காட்டி-
தேயா நிலாவுக்குச்
சோறு ஊட்டினாள்

இங்கே கவிஞர் வாலி ராமனையே தேயா நிலவாக குறிப்பிடுகிறார்.

இதுபோல கவிஞர் வைரமுத்து கடல் மீது தனக்குள்ள காதலை பல கவிதைகளில் வெளிப்படுத்தியுள்ளார். அவரது ‘தண்ணீர் தேசம்’ என் மனதைக் கவர்ந்த, என்னை தூங்க விடாமல் செய்த ஒரு அற்புதப் படைப்பு. அவரது ’அலைகள்’ கவிதையில் இருந்து ஒரு சில வரிகள்…

அலைகளே! நீர்மேல் ஆடுந் தண்ணீர்
மலைகளே! கடலின் மந்திரக் கைகளே!
வித்தை புரிந்து வீசுங் காற்று
நித்தந் திரிக்கும் நீர்க்கயிறுகளே..

என்கிறார்.

கடைசியாக, இந்த பதிவை கவியரசரின் கவிதையை தந்து முடிக்கிறேன்…

நான் காவியத்தாயின் இளையமகன்
காதல் பெண்களின் பெருந்தலைவன்
பாமர ஜாதியில் தனி மனிதன்
நான் படைப்பதினால் என்பேர் இறைவன்

நான் இங்கே தந்துள்ள அனைத்தும் கவிதைக் கடலின் ஒரு துளியே. நீங்களும் உங்கள் மனங்கவர்ந்த கவித்துளிகளை இங்கே பகிர்ந்து கொள்ளும்படி தாழ்மையுடன் கேட்டுக் கொள்கிறேன்.

மேலும் இந்த கவிதைத் தொடரை கவியரசருடன் ஆரம்பித்து அவருடனே முடிக்கிறோம். ஆகையால்…இது ஒரு ஆரம்பமே!!!

தமிழுக்கு நன்றி…தமிழ்த்தாய் தந்த நேரடிப் பிள்ளைகளுக்கு நன்றி.